ముఖ్యమంత్రి జగన్ తీసుకొచ్చిన అమ్మఒడి పథకంపై సినిమా తీయడం ఆనందంగా ఉందన్నారు ఎమ్మెల్యే పాల్గుణ. తాను కూడా ఓ ముఖ్యమైన పాత్ర చేయడం గర్వంగా ఉందన్నారు.

ఏపీ ముఖ్యమంత్రి వైఎస్ జగన్ నవరత్నాల పేరుతో సంక్షేమ పథకాలను అమలు చేస్తున్నారు. వీటిలో ముఖ్యంగా అమ్మఒడి పథకాన్ని ప్రతిష్టాత్మకంగా తీసుకున్నారు. ఎన్నో ప్రశంసలు అందుకున్న ఈ పథకంపై ఏకంగా సినిమా రాబోతోంది. శ్రీదత్తాత్రేయ క్రియేషన్స్‌ బ్యానర్‌ ఓ మూవీని తీస్తోంది. ఈ చిత్రంలో విశాఖ జిల్లా అరకు ఎమ్మెల్యే చెట్టి ఫల్గుణ ప్రధానోపాధ్యాయుడి పాత్ర పోషిస్తున్నారు. ఈ షూటింగ్‌కు తహసీల్దార్‌ ప్రకాష్‌రావు క్లాప్‌ కొట్టారు. పాడేరు మండలంలోని దిగుమోదాపుట్టు గిరిజన సంక్షేమ ఆశ్రమ పాఠశాలలో కొంత షూటింగ్ జరిగింది. ఎమ్మెల్యేపై కొన్ని సన్నివేశాలను చిత్రీకరించారు.

ముఖ్యమంత్రి జగన్ తీసుకొచ్చిన అమ్మఒడి పథకంపై సినిమా తీయడం ఆనందంగా ఉందన్నారు. తాను కూడా ఓ ముఖ్యమైన పాత్ర చేయడం గర్వంగా ఉందన్నారు. ఈ పథకాన్ని సీఎం జగన్‌ ఎంతో పారదర్శకంగా అందిస్తున్నారన్నారు. అలాగే రాష్ట్రవ్యాప్తంగా ప్రభుత్వ పాఠశాలలను నాడు–నేడు పేరుతో అభివృద్ధి చేశారని ప్రశంసించారు. అమ్మఒడి పథకంపై చిత్రం నిర్మించడం గొప్ప విషయమని చిత్ర నిర్మాత, దర్శకులను అభినందించారు. ఈ సినిమాకు త్రినాథ్‌ దర్శకత్వం వహిస్తున్నారు. త్వరగా షూటింగ్ పూర్తి చేసుకుని విడుదల చేస్తామని నిర్మాణ సంస్థ తెలిపింది.