కొండపల్లి చైర్మన్‌ ఎన్నిక వాయిదాపై తెలుగుదేశం పార్టీ అధినేత నారా చంద్రబాబు నాయుడు స్పందించారు. కడప జిల్లా పర్యటనలో ఉన్న ఆయన.. ఈ విషయం తెలుసుకుని మండిపడ్డారు. ఆంధ్రప్రదేశ్‌లో ప్రజాస్వామ్యం ఉందా అని ఆయన ప్రశ్నించారు. విధ్వంసం సృష్టించి వాయిదా వేయడం దారుణమని ఫైర్ అయ్యారు. ఎన్నిక నిర్వహణ రాకపోతే స్టేట్ ఎలక్షన్ కమిషనర్, డీజీపీలు తప్పుకోవాలని డిమాండ్ చేశారు.

కొంపల్లిలో తెలుగుదేశం పార్టీ సభ్యులను లోబర్చుకుని పాగా వేయాలని చూస్తున్నారని.. ఇక ఎన్నిక ఎందుకు..? డైరెక్ట్‌గా వైఎస్సార్సీపీ వారినే చైర్మన్ చేయాలంటూ చంద్రబాబు ఫైర్ అయ్యారు. సంబంధంలేని వ్యక్తులు కౌన్సిల్ కార్యాలయంలోకి వచ్చి హల్‌చల్ చేస్తున్నారని.. పోలీసులు ఏం చేస్తున్నారని ప్రశ్నించారు. తెలుగుదేశం పార్టీ సభ్యుల ఓర్పును చేతగాననితనంగా చూడొద్దని ఆయన హెచ్చరించారు. ఎన్నిక నిర్వహించి.. ప్రజస్వామ్య విలువలను కాపాడాలని చంద్రబాబు కోరారు.