జగన్ ప్రభుత్వానికి కేంద్ర ప్రభుత్వం అదిరే శుభవార్త చెప్పింది. ఇప్పటికే అప్పుల్లో కూరుకుపోయిన జగన్ సర్కారుకు మరోసారి..!

ఏపీలో జగన్ ప్రభుత్వానికి కేంద్ర ప్రభుత్వం అదిరే శుభవార్త చెప్పింది. ఉద్యోగాలకు జీతాలు ఇవ్వలేని పరిస్థితుల్లో రూ.10,500 కోట్లు రుణం తీసుకునేందుకు కేంద్ర ఆర్థిక శాఖ అనుమతిచ్చింది. ఇప్పటికే తీవ్ర అప్పుల్లో కూరుకుపోయిన రాష్ట్ర ప్రభుత్వం.. మళ్లీ, రుణాలు తీసుకునేందుకు వెళ్లింది. బహిరంగ మార్కెట్‌ నుంచి రాష్ట్ర ప్రభుత్వం మరింత అప్పు తెచ్చుకునేందుకు కేంద్రం నుంచి అనుమతి లభించింది. మరో రూ.10,500 కోట్ల రుణానికి కేంద్ర ఆర్థిక శాఖ వ్యయ విభాగం అనుమతిచ్చింది. ఈ మేరకు రిజర్వు బ్యాంకుకు కేంద్రం వర్తమానం పంపింది. రుణ సేకరణ కోసం ఇప్పటికే తీవ్ర ఇబ్బంది పడుతున్న జగన్ ప్రభుత్వానికి, కేంద్ర ప్రభుత్వ తాజా నిర్ణయంతో భారీ ఊరట లభించినట్లయింది. కేంద్రం ప్రస్తుత ఆర్థిక సంవత్సరంలో తొలి 9 నెలల కాలానికి అనుమతిచ్చిన పరిమితి మేరకు ఇప్పటికే రుణ స్వీకరణ పూర్తయింది. అనుమతికి లోబడి.. చివరి విడతగా రూ.1,000 కోట్లను గత మంగళవారం రుణంగా స్వీకరించింది దీంతో కేంద్ర ప్రభుత్వం విధించిన పరిమితికి చేరుకోవడంతో.. మున్ముందు రాష్ట్ర ఆర్థిక అవసరాలు ఎలా అన్న ప్రశ్న తలెత్తింది. ఈ తరుణంలో రాష్ట్ర ప్రభుత్వ ప్రయత్నాలు ఫలించి కొత్తగా అప్పు పుట్టే మార్గం కనిపించింది.

ఢిల్లీలో ఆర్థిక మంత్రి వరుస ప్రయత్నాలు
రాష్ట్ర ఆర్థిక మంత్రి బుగ్గన రాజేంద్రనాథ్‌రెడ్డి, ప్రభుత్వ ప్రధాన కార్యదర్శి ఆదిత్యనాథ్ దాస్‌తో సహా ఆర్థిక శాఖ అధికారులు పదేపదే ఢిల్లీ వెళ్లి రుణ పరిమితి పెంపు కోసం ప్రయత్నాలు చేశారు. రాష్ట్ర ప్రభుత్వ వాదనను వివిధ కోణాల్లో వినిపించారు. అంతకు ముందు సంవత్సరాల్లో అదనంగా తీసుకున్న రుణాల కోత నుంచి ఈ ఏడాది మినహాయించాలని కోరారు. ఈ నేపథ్యంలో తాజాగా, కేంద్ర ఆర్థిక శాఖ మరో రూ.10,500 కోట్ల రుణానికి అనుమతి ఇచ్చింది. దీంతో డిసెంబరు వరకు ఉన్న రుణ పరిమితిని పెంచినట్లయింది. సెప్టెంబర్, అక్టోబర్, నవంబర్, డిసెంబర్ నెలల్లో ఈ మొత్తాన్ని రాష్ట్రం అప్పుగా తీసుకునే వెసులుబాటు కల్పించింది. దీంతో తొలి తొమ్మిది నెలల కాలానికి రాష్ట్ర రుణ పరిమితి రూ. 31,251 కోట్లకు పెరిగినట్లయింది.