మంత్రాలయం టీడీపీ ఇన్‌చార్జి తిక్కారెడ్డిపై హత్యాయత్నంపై టీడీపీ అధ్యక్షుడు నారా చంద్రబాబు నాయుడు సీరియస్ అయ్యారు. రాష్ట్రంలో శాంతిభద్రతలను ప్రశ్నిస్తూ డీజీపీకి ఆయన లేఖ రాశారు.

మంత్రాలయం టీడీపీ ఇన్‌చార్జి తిక్కారెడ్డిపై హత్యాయత్నంపై టీడీపీ అధ్యక్షుడు నారా చంద్రబాబు నాయుడు సీరియస్ అయ్యారు. రాష్ట్రంలో శాంతిభద్రతలను ప్రశ్నిస్తూ డీజీపీకి ఆయన లేఖ రాశారు. శాంతిభద్రతలను కాపాడలేకపోతే డీజీపీ రాజీనామా చేసి వెళ్లిపోవాలంటూ లేఖలో ఘాటుగా పేర్కొన్నారు.

ముఖ్యమంత్రి వై.ఎస్.జగన్‌మోహన్ రెడ్డి అండతోనే తిక్కారెడ్డిపై హత్యాయత్నం చేశారంటూ ప్రతిపక్ష నేత చంద్రబాబునాయుడు ఆరోపించారు. పట్టపగలే దాడులు చేస్తుంటే పోలీసు యంత్రాంగం నిద్రపోతోందా అంటూ విమర్శించారు. రెండుసార్లు హత్యాయత్నం జరిగినా పోలీసులు ఎందుకు రక్షణ కల్పించలేదని చంద్రబాబు డీజీపీని నిలదీశారు. టీడీపీ కార్యకర్తల సహనాన్ని చేతగాని తనంగా తీసుకోవద్దని.. మావాళ్లు తిరగబడితే పరిస్థితులు వేరేలా ఉంటాయని చంద్రబాబు లేఖలో పేర్కొన్నారు. ఇదే ఘటనపై టీడీపీ జాతీయ కార్యదర్శి నారా లోకేష్ నిన్న స్పందిస్తూ.. ప్రజాస్వామ్యాన్ని ఫ్యాక్షన్ కత్తికి బలిస్తున్నారని మండిపడ్డారు. జాతరకు హాజరైన తిక్కారెడ్డిని హతమార్చడానికి ప్రయత్నించారని.. గతంలోనూ ఆయనపై హత్యాయత్నం జరిగినా పోలీసులు కనీస భద్రత కల్పించకపోవడం అనేక అనుమానాలకు దారి తీస్తుందంటూ ట్వీట్ చేశారు.

అయితే.. నిన్న కర్నూల్ జిల్లా కోసిగి మండలం పెద్ద బొంపల్లి రథోత్సవంలో పాల్గొనడానికి వచ్చిన మంత్రాలయం టీడీపీ ఇన్‌చార్జి తిక్కారెడ్డిపై హత్యాయత్నం జరిగింది. వైఎస్సార్‌సీపీ, టీడీపీ నేతల మధ్య వాగ్వాదం జరగడంతో ఇరు వర్గాలు ఒకరిపై మరొకరు దాడి చేసుకున్నాయి. ప్రత్యర్థులు తిక్కారెడ్డిపై రాళ్ల దాడికి యత్నించడంతో కార్యకర్తలు అడ్డుకున్నారు. ఈ ఘటనలో ఐదుగురికి తీవ్ర గాయాలయ్యాయి. కాగా 2019 ఎన్నికల ప్రచారంలోనూ తిక్కారెడ్డిపై హత్యాయత్నం జరిగిన సంగతి తెలిసిందే.